حەمە قوتوو

ساڵی ١٩٣٩ لە شاری هەڵەبجە لە دایك بووە. بەهۆی ئەوەی كە لەمنداڵییەوە بەشێوەیەكی پۆشتە جوان دەركەوتووە، بە (حەمە قوتوو) ناسراوە. ساڵی ١٩٥٤ چووتە ئێستگەی بەغدا و لە تاقیكردنەوەی دەنگیدا سەركەوتووبووە و شەش گۆرانی بەناوەكانی (بارانە، گوڵاڵە سوورە، خانم خانم، لەكۆڵانی تەنگەبەر، مەگری مەگری و هەی بەلار و بەلار) تۆمار كردووە. هەر لەم كاتانەدا، بە هونەرمەندان (عەلی مەردان، عیسا بەورایی و حەسەن جەزراوی) ئاشنابووە. ژمارەیەك گۆرانی بۆ تەلەڤزیۆنی كەركووك تۆمار كردووە و لەگەڵ تیپی مۆسیقای سلێمانی و مەولەوی و شنروێدا بەرهەمی هەیە و لە شارەكانی سلێمانی، هەولێر و دهۆك بەشداری چەندین ڤێستیڤاڵ و ئاهەنگێكی كردووە و ئەندامی سەندیكای هونەرمەندانی كوردستان بووە.